काठमाडौँ, २४ माघ काठमाडौँको काँडाघारीस्थित अक्षरा स्कुलमा ‘एजुकेसन इन एभ्री स्टेप’ भन्ने मूल नाराका साथ ‘चौथो अक्षरा एजुकेसन एक्स्पो’ भव्य रूपमा सम्पन्न भएको छ। विद्यालयले हरेक दुई वर्षमा आयोजना गर्ने यो बृहत् शैक्षिक प्रदर्शनीमा विद्यार्थीहरूले वर्षभरि सिकेका सीप र सिर्जनाहरू प्रस्तुत गरेका थिए।
सिर्जनशीलता र ‘लेखक कार्यशाला’
एक्स्पोको मुख्य आकर्षणको रूपमा रहेको ‘लेखक कार्यशाला’ मा कक्षा ८ र ९ का विद्यार्थीहरूले तयार पारेका पुस्तकहरू प्रदर्शन गरिएको थियो। विद्यार्थी महिम जोशीका अनुसार यो कार्यशालाको योजना शैक्षिक सत्रको सुरुदेखि नै बनाइएको थियो। “हामीजस्तै युवा लेखकहरूले पुस्तक वर्षको आरम्भदेखि नै लेख्न सुरु गरेका थियौँ। यहाँ अङ्ग्रेजी र नेपाली दुवै भाषाका पुस्तकहरू छन्,” जोशीले बताए।
प्रदर्शनीमा हरर, थ्रिलर, र फ्यान्टासी फिक्सन जस्ता विभिन्न विधाका पुस्तकहरू राखिएका थिए। अर्का विद्यार्थी लक्ष्यजीत मल्लले हरेक विद्यार्थीले अनिवार्य रूपमा पुस्तक लेख्नुपर्ने जानकारी दिँदै भने, “यसले हाम्रो क्रिटिकल थिङ्किङ र क्रिएटिभिटीलाई लेखनको माध्यमबाट देखाउन मद्दत गर्छ।”
विद्यार्थीको निरन्तर सिकाइको प्रतिफल: प्रिन्सिपल लोप्चन
विद्यालयका प्रिन्सिपल मिलन लोप्चनले यस एक्स्पोलाई विद्यार्थीहरूको निरन्तर सिकाइको प्रतिफलका रूपमा अथ्र्याउनुभयो। उहाँका अनुसार यो प्रदर्शनीले विद्यार्थीहरूमा व्यवहारिक ज्ञान र नेतृत्व क्षमताको विकास गरेको छ। यो काम आजको मात्र नभएर वैशाखदेखि नै ‘ओभर द इयर’ विद्यार्थीहरूले पढ्दै र प्रोजेक्टमा काम गर्दै बिल्ड गरेको नतिजा भएको बताउनुभयो। उहाँले भन्नुभयो, “अघिल्लो वर्षको तुलनामा यसपालि बच्चाहरूले एकदमै इन्जोय गरिरहेका छन् र अडियन्सको क्वेस्चनिङ पनि एकदम धेरै इन्ट्रेस्टिङ छ।”
उत्साहजनक सहभागिता र प्रतिक्रिया
प्रदर्शनी अवलोकन गर्न बालकोटको वैदिक स्कुल लगायत विभिन्न विद्यालयका विद्यार्थी, अभिभावक र बाह्य आगन्तुकहरूको बाक्लो उपस्थिति थियो। अवलोकनकर्ता साथीहरूले पनि आफ्नो विद्यालयमा यस्तै ‘लेखक कार्यशाला’ सुरु गर्ने इच्छा व्यक्त गरेको विद्यार्थीहरूले सुनाए।
अक्षरा स्कुलले हरेक दुई वर्षमा ‘एक्स्पो’ र हरेक वर्ष ‘लिटरेचर फेस्टिभल’ आयोजना गर्दै आएको छ, जसले विद्यार्थीहरूलाई आफ्नो सीप र शिक्षा प्रस्तुत गर्ने एउटा साझा मञ्च प्रदान गर्दै आएको छ।
