काठमाडौं, कात्तिक २५ ।
काठमाडौँ । नेपाल विद्युत् प्राधिकरण (ने.वि.प्रा.) मा कर्मचारीहरूको नयाँ सङ्गठन ‘नेपाल विद्युत् प्राधिकरण ऊर्जाशील कर्मचारी सङ्घ’ औपचारिक रूपमा दर्ता भएको छ। श्रम, रोजगार तथा सामाजिक सुरक्षा मन्त्रालयअन्तर्गतको श्रम तथा रोजगार कार्यालय, टेकु–काठमाडौँले सङ्घलाई २०८२ कात्तिक २३ गते दर्ता प्रमाणपत्र सङ्ख्या ४०८३ जारी गरेको हो।
ट्रेड युनियन ऐन, २०४९ (संशोधनसहित) को दफा ३ को उपदफा (३) र ट्रेड युनियन नियमावली, २०७१ को नियम ८ र १४ बमोजिम दर्ता गरिएको यो सङ्घले नेपाल विद्युत् प्राधिकरणका कर्मचारीहरूको हक-अधिकार र पेसागत हितको संरक्षण लाई आफ्नो प्राथमिक उद्देश्य बनाएको जनाएको छ।
सङ्घले हालका लागि केन्द्रीय तदर्थ समिति २०८२ गठन गरेको छ। जसमा गजेन्द्र सिंह धापा र सरद धापा संस्थापक सल्लाहकारका रूपमा रहनुभएको छ भने इन्द्रप्रसाद न्यौपाने संयोजक र महेश्वर दत्त पन्त सह-संयोजक रहनुभएको छ। उक्त समितिमा विभिन्न विभाग, शाखा र प्रदेश कार्यालयहरूबाट प्रतिनिधित्व हुने गरी ४७ जना सदस्यहरू समावेश छन्।
सङ्घका पदाधिकारीहरूले ऊर्जाशील कर्मचारी सङ्घ संस्थागत सुधार, सेवा-सुविधाको एकरूपता र समग्र कार्यक्षमता अभिवृद्धि मा योगदान पुर्याउने साझा मञ्च बन्ने विश्वास व्यक्त गरेका छन्। उनीहरूले प्राधिकरणभित्र विद्यमान विविध कर्मचारी सङ्घ-संस्थाहरूसँग सहकार्य गर्दै सकारात्मक र पेसागत वातावरण निर्माणमा ध्यान केन्द्रित गर्ने बताएका छन्।
नेपाल विद्युत् प्राधिकरणमा यसअघि पनि विभिन्न कर्मचारी सङ्गठनहरू क्रियाशील रहँदै आएका छन्। नयाँ दर्ता भएको ‘ऊर्जाशील कर्मचारी सङ्घ’ थप एक सङ्गठनको रूपमा संस्थाभित्र प्रवेश गरेको हो।
