स्वीकार खड्का
नमस्कार, म स्वीकार खड्का। म कक्षा सातमा पढ्छु। म वान डे क्रिकेट एकेडेमीमा क्रिकेट सिक्दै छु। अहिले म एकदमै खुसी छु। हाम्रो टिम वर्ल्ड जुनियर प्रिमियर इन्टरनेसनल लिगका लागि श्रीलंका जाँदै छ। यो जुनियरको वर्ल्ड कप जस्तै हो, अन्डर-१४ का लागि।
हामीले श्रीलंकामा चारवटा खेल जित्यौँ भने युकेमा हुने क्वालिफायरको लागि जान पाउँछौँ। त्यसैले हामीले धेरै मेहनत गरेका छौँ। हामी बिहान-बिहान उठेर दुई घण्टा अभ्यास गर्छौं। एकेडेमीमा गएर म्याच खेल्छौँ, ड्रिल्स र नेटिङ गर्छौँ। यहाँ हामीलाई ड्युजबलले खेल्न सिकाउनुभएको छ। ब्याटिङ, बलिङ, किपिङ र फिल्डिङ सबैको अभ्यास हुन्छ।
हामी १५ जनाको टिम छौँ। अक्षराबाट ६ जना, मातृभूमिबाट ४ जना, र एकेडेमीबाट ५ जना खेलाडी। हामीसँग दुई जना कोच पनि हुनुहुन्छ। हामी भदौ ३१ गते श्रीलंका जाँदै छौँ।
हाम्रो टिम एकदमै राम्रो छ। हाम्रो टिममा ब्याटर, बलर, र अलराउन्डर सबै छन्। ओपनिङ, मिडल अर्डर र फिनिसर पनि एकदमै राम्रा छन्। पुरुषोत्तम सरले हामीलाई सधैँ सकारात्मक भएर खेल्नुपर्छ भन्नुहुन्छ। उहाँले सबैलाई आ-आफ्नो भूमिका दिनुभएको छ– कसैले हिटिङ गर्ने, कसैले खेललाई अगाडि बढाउने।
हामीलाई थाहा छ उनीहरूको टोलीका खेलाडीहरू हामीभन्दा अग्ला छन् र धेरै खेलहरू खेलेका पनि छन्। तर, हामीले हार मान्दैनौँ। हामी अनुशासित भएर खेल्नेछौँ। क्याच छुट्यो भने एक-अर्कालाई गाली नगरी प्रोत्साहन दिनेछौँ। हाम्रो टिममा अझै राम्रा खेलाडीहरू पनि छन्, जो खर्चका कारण जान पाउनुभएको छैन। यदि उहाँहरू पनि जानुभएको भए हाम्रो टिम अझै बलियो हुन्थ्यो। तर, हामीलाई हाम्रो टिममाथि विश्वास छ। हाम्रो जित्ने सम्भावना पनि धेरै छ।
हामी हाम्रो देशका लागि उत्कृष्ट प्रदर्शन गर्न चाहन्छौँ र नेपालको नाम उच्च राख्न चाहन्छौँ। हामी श्रीलंका र इन्डियाजस्ता टिमसँग खेल्नुपर्ने हुन सक्छ। म निकै उत्साहित छु।
