- कुल लागत ९.६ अर्ब रुपैयाँ रहेको छ। यसमध्ये ७.२ अर्ब रुपैयाँ चार बैंकहरूले लगानी गर्ने भएका छन्।
- सिटिजन इन्टरनेशनल बैंक लिड बैंकको रूपमा रहनेछ। नबिल, एनआईएमबी, र सिद्धार्थ बैंक सह-लगानीकर्ता हुन्।
- आयोजना ४४ महिनाभित्र सम्पन्न गरिने लक्ष्य राखिएको छ।
काठमाडौं, १६ भदौ ।
स्वच्छ ऊर्जा प्रवर्द्धनको लक्ष्यसहित निर्माणाधीन सानी भेरी जलविद्युत आयोजना (४४.५२ मेगावाट)ले आफ्नो वित्तीय व्यवस्थापनको महत्वपूर्ण चरण पूरा गरेको छ। एक्स्पर्ट हाइड्रो इन्भेस्टमेन्ट प्रा.लि. द्वारा सञ्चालित यस आयोजनाको कुल लागत ९ अर्ब ६० करोड रुपैयाँ रहेको छ, जसमा ७ अर्ब २० करोड रुपैयाँ विभिन्न बैंकहरूले लगानी गर्ने भएका छन्।
- आयोजनाको मुख्य लगानीकर्ता (लिड बैंक) को रूपमा सिटिजन इन्टरनेशनल बैंक रहनेछ भने नबिल बैंक, नेपाल इन्भेस्टमेन्ट मेगा बैंक (एनआईएमबी), र सिद्धार्थ बैंक पनि सह-लगानीकर्ता बैंकहरूका रूपमा सहभागी हुनेछन
कम्पनीका अध्यक्ष अंगेश घिमिरेले जानकारी दिँदै भने, “सानी भेरी आयोजना केवल ऊर्जा उत्पादनको माध्यम होइन, यो ग्रामीण विकास, रोजगारी सिर्जना, र दिगो भविष्यको आधार हो। बैंकहरूको विश्वास र सहकार्यले हाम्रो लक्ष्यलाई थप मजबुती दिएको छ।”
आयोजनाको औपचारिक कार्यक्रममा सांसद जनार्दन शर्मा, नेपाल विद्युत प्राधिकरणका कार्यकारी निर्देशक हितेन्द्रदेव शाक्य, तथा आध्यात्मिक साधक एलपी भानु शर्मा लगायत विशिष्ट अतिथिहरूको उपस्थिति रहेको थियो। कार्यक्रममा एक्स्पर्ट हाइड्रोका म्यानेजिङ डाइरेक्टर सन्तोष नेपालले आयोजना ४४ महिनाभित्र सम्पन्न गरिने जानकारी दिए।
रुकुम पूर्वमा निर्माणाधीन यो आयोजना रन-ऑफ-रिभर मोडेलमा आधारित छ, जसले वातावरणीय सन्तुलन कायम राख्दै स्थानीय स्रोतको उपयोग गर्नेछ। आयोजना सम्पन्न भएपछि राष्ट्रिय प्रसारण प्रणालीमा महत्वपूर्ण योगदान पुर्याउने अपेक्षा गरिएको छ।
