काठमाडौं , ११ भदौ ।
पाशुपत क्षेत्रभित्रको रुद्रगाडेश्वर महादेवको मन्दिर छेउमा एउटा पुरानो रूख छ, जुन करिब ४-५ वर्षदेखि चिरिएर भाँचिने अवस्थामा पुगेको छ। भुइँबाट करिब ६-७ मिटरको उचाइमा रूखको मुख्य हाँगा नै चर्किएको छ र जुनसुकै बेला पनि ढल्न सक्ने अवस्थामा रहेको देखिन्छ। यसरी जोखिम बढे पनि रूखलाई हटाउन वा व्यवस्थापन गर्न पशुपति क्षेत्र विकास कोषले कुनै कदम चालेको छैन।
उल्टो, कोषले यही जोखिमपूर्ण स्थानलाई यज्ञ, अनुष्ठान र अन्य धार्मिक कार्यका लागि लामो समयसम्म भाडामा दिएको छ। रूखको ठिकमुनि यस्ता धार्मिक गतिविधिहरू भइरहँदा, सुरक्षाको सवाल गम्भीर बनेको छ।
यस विषयमा प्रश्न उठ्दा कोषले आफ्नो जिम्मेवारीबाट पन्छिनका लागि केही उपायहरू अपनाएको देखिन्छ । उदाहरणका लागि, ‘यहाँ यज्ञ अनुष्ठान गर्न आउने मान्छेहरू नआउनुहोस्’ भनी गेटमा सूचना टाँस्ने गरेको छ।
तर, यस्ता सूचनाहरूले मात्रै सम्भावित दुर्घटनाबाट जोगिन सकिँदैन । यदि रूख ढलेर कुनै अप्रिय घटना भइहालेमा, यस्तो पत्रले कोषलाई कानुनी वा नैतिक दायित्वबाट मुक्त गर्न सक्दैन। सुरक्षाको जिम्मेवारी कसले लिने भन्ने प्रश्न ज्युँका त्युँ छ।
स्थानीय्वासी र भक्तजनले प्रकारको जोखिमपूर्ण रूखलाई छिटोभन्दा छिटो वैज्ञानिक तरिकाले व्यवस्थापन गर्नुपर्छ। यसको समाधान रूखलाई पूरै हटाउने वा त्यसलाई सुरक्षित तरिकाले छँटनी गर्ने हुन सक्छ। तर, कोषको ढिलासुस्ती र बेवास्ताले गर्दा यो स्थान अहिले ‘दुर्घटनाको पर्खाइमा’ रहेको जस्तो देखिएको छ। धार्मिक स्थलमा आउने भक्तजन र यज्ञ आयोजना गर्ने व्यक्तिहरूको सुरक्षामाथि गम्भीर प्रश्न उठिरहेको छ।
के पशुपति क्षेत्र विकास कोषले कुनै ठूलो दुर्घटना नभएसम्म यो विषयलाई बेवास्ता गरिरहने हो? स्थानीयवासी र भक्तजनहरूले यसको जवाफ खोजिरहेका छन्।
कोषको सुचना पढ्नुहोस:
